الثلاثاء، 23 فبراير، 2010

قصتي في الباص!!




دواااام اول اسبوع ....
بين النوم والطالب يفتح الله
...
في الكلاس ماتدري الا راس اللي قدامك مال وغطى عليك السبوره... ولا ماتدري الا ذا اللي جنبك حط راسه على كتفك.....
وحتى النوم في الليل مايضبط .... يعني انواع الحلوم ونومة مقطعه وخياااااس وقلق .... وكل هذا من اول اسبوع
.....
===
جيت ذاك اليوم... مداوم وتوني لابس جينزي ولابس تي شيرت جديد
 <<<< جايتني من دبي ...شكرا خالي حمد

وطلعت من الغرفه عشان عندي كلاس لغة الكفار الانجليزي ....على ذا الصبح.... وانطلقت بخطواتي المتسحبه على الازفلت اللي هو احد مشتقات البترول... حتى وصلت الباصات اللي انا اعتبرها سريري الثاني....

ومن حظي صار الباص بارد جدا وعاد انا اول من ركب واروح في احد الزويا واندس ....واحط راسي على المرتبه اللي قدامي وانام
.... وطالت النومه شوي وتعمقت فيها... 

وتحرك الباص... عاد عدلت راسي ورحت وحطيته على القزازه وكملت نومي.... حتى خبط شي غريب كثيف الشعر كتفي لاتوقض وانا معصب بسببه... مطلقا اللعنات بيني وبين نفسي... لاشاهد هذا الكائن الذي افسد علي نومتي ...
وفجأة حولت اللعنات الى شي آخر...... وطارت عيناي فلم تصدق ماترى....


فاذا على كتفي رأس.... ولكنه ليس اي رأس!!!
فقد كان ذاك الذي استند على كتفي وغط في النوم ...ذو الشعر الاشقر... رأس فتاة شابة... لبست عباة سوداء... مطرزة بأجمل الألوان... وشعرها الاشقر المسدل على كتفيها.... وجسمها النحيف قد استند على جسمي...لتغط في نومها ...واغط انا في تأمل ذاك القمر...فشفتين وريديتين...وخد احمر...وعينان خجولتان...وباقي الوصف مشفر+18... جعلتني افهي...وانا اقول جعلك ماتقومي    .....قصدي ... جعل الباص يضيع طريقة وتبقى ذي نايمه على كتفي الين ماتشبع نوم....

قعدت افكر
... هذي وش لون جت هنا...قلت يمكن الجامعة بعد الاجازة صارت مختلطه....لا لا مستحيل يصير كذا....اصلا هم ماخذوا موافقتي عشان تصير مختلطه.....وقلت يمكن انها ضيعت وجت هنا ... بس وش اللي قردها وخلاها تركب باص اولاد.... وتوصلت اخيرا انها جايه من سكن المدرسين تشوف ابوها...

عاد تعرفونن انتم... الرومانسية في وادي وانا في وادي
...
فبدأت ابولع ريقي... الذي قد نشف.... وش اسوي مع الكائن الغريب ذا .... وجهي صار احمر ... وبديت اتصبصب عرقا.....وبديت اناظر حولي في الباص... عشان لا يشوفني احد من الطلاب اللي اعرفهم....
تمنيت انها وحدة شينه عشان اقول لها قومي عن كتفي.... لكن كانت قمر راكب في الباص
....

المهم الباص راح لم المباني الدراسية ونزلوا كل الطلاب الا انا وهذي البنت...عاد انا بديت اهوجس.... في حصة الانجليزي وان المدرس بيسجلني غياب... لكن قلت هذي لغة الكفار آآآآآبو اللي يحظر انقليزي وذي البنت على كتفه ياشيخ
....

المهم الباص هذاك كان شغلة انه يروح للمباني الدراسية وسكن الطلاب فقط ... فرجع الباص للسكن من جديد.... ووقف مره ثانيه عند عمارتي... لكن انا مستحيل اتحرك.... فجأة هي رفعت راسها... وانا تنحت فيها وفجأة التفت علي... 


صدفة ومن بين كل الناس علقني
.... من يوم شفته وعيني جت في عينه....حسيت شي في عيونه حيل يجذبني...

فعلا من اول ماجت عيني في عينها ضعت.... وين علومك يافيصل
.... وش السالفة يابو مساعد....
المهم... قالت: لو سمحت ....انا مدري وش ارد ... اقول ايه اسمح ولا آآآمري ولا لا ماسمحت وفي نفس الوقت ابغى رد يكون اتكيت مهوب اطلع قروي قدامها ...وزين قلت نعم ... وقالت ابي مويه.....

عاد مخي قام يطحس ويدور ويفكر وش يرد .... اقول لها روحي البقاله
... ولا شوفي عند المسجد برادة... وقبل لا ارد قالت : عطشااااانه مره... قلت ذي مافيها صبر... قلت عندي في الغرفه ... قالت طيب تعال جب لي... نزلنا انا وهي ودخلت غرفتي.... وذبيت عليها غرشتين ماء-غرشه تعني قاروره- الا المسكينه معها حبتين بنادول طلعتهم وكلتهم وشربت المويه.... انا مدري وش تبي ذي ...ووش اقول لها...
قالت لي شكرا .... وانا حسيت انها اليفه .... وقلت عفوا ...وبدى قلبي يرتاح لها
...

وشافت عندي كتاب الرياضيات وقالت تدرسون هذا وقلت لها ايه وانا حافظه صم <<<<<<<
نصاب
وقالت لي وش اسمك... قلت فيصل ...
قالت طيب انا عندي مسألة ماعرفت احلها قلت جيبيها وتعالي واجلسي جنبي....جت و قعدت جنبي
...
وطلعت المسألة... وقلت لها هذي سهله ... ونزلت علي الدفره
.... وحليتها لها في دقيقه....
وابتسمت وابتسمت لها...وطقيناها سواليف وضحك وتنكيت... ورحت وجبت لها من الثلاجه شوكلاطات و بساكيت
....
فجأة قالت لي: فيصل غمض عيونك
....
غمضت عيوني واذا بي احس بش رطب حول فمي
.... وشي يدغدغ شفايفي( وبرواية اخرى ...براطمي)...
ونزل علي الطوع فجأة.... وقلت الرسول صلى الله عليه وسلم قال لايخلوا رجل بإمرأة الا كان الشيطان ثالثهما... 
فتحت عيوني..... فاذا سعبولة قد انسلت من فمي ذا المنفتح ودحدرت... وذباب قد وجد منصة للهبوط فهبط على احدى شفتاي الناشفه.... واذا بي عند مبني 5و الطلاب ينزلون من الباص وانزل معهم... وانا افكر في ذا اللي صار... وافكر وين راحت البنت؟؟... ورضيت بالأمر الواقع ودخلت حصة لغة الكفار ....

\\ مايستفاد من القصة
أ- لاتنام وانت فاتح فمك ابداً
ب- اول اسبوع في الدراسة لاتشره على احد
ج-يبغالنا كم كورس في الرومانسية
د- لاتداوم ابدا وانت لابس جنز وزبيريه
هـ- لغة الكفار ودراستها اصرف من النوم في الباص
وـ- القصة مليئة بالفوائد وعليك استخراج الباقي وكتابته في الردود



=======

بعد كتابتي لمقال كنت مدمن!! ويمكنكم الوصول اليه من خلال الضغط هنا
وكونه اعجب الكثير من قراء مدونتي حبيت ادخل في هذي التجربة وهي اول مره اجرب اكتب بهذه الطريقة وبهذا الاسلوب
فاذا اعجبتكم فالحمد لله وانتظر منكم الردود...
وان لم تعجبكم فاتمنى منكم مراسلتي او الرد في هذه التدوينه وتبيين اخطائي ومنها استفيد ان شاء الله في التدوينات القادمة ان شاء الله...
لان عندي فكرة مشروع كبيره لكن الى الآن وهي تحت الدراسة....
والحين صرت اعرف استخدم السمايلات...

هناك 16 تعليقًا:

  1. ههههههههههههههههههههههههههههههههههه
    اي والله انك صادق هههههههههههههههههههه
    وعن انها لحسة اول اسبووع فما الومك
    اصلا دامك في البترول وتدرس لغة الكفار
    فهذا يكفي بحد ذاته انه يضرب فيوزاتك
    يكفيك المصايب اللي في السكن لحاله خخخخخخخ

    والله اسلوبك اليييييييم
    اندمجيت في القصة والله
    اهم شي ان الحلم كان على وشك
    ينتهي نهاية سعيدة خخخخخ

    استمر في هالطرييقة اسلوبك ممتاز في التسحيب
    والجرات عالفيس ههههههههههه

    وبعدين ياخي دامك عرفت كيف تسوي فيسات في الوشسمه حقتك علمنا ياشيخ
    خلنا نستفيد منك..

    تدوينة مميزة..
    لا تسحب علينا.. ننتظرك عما قريب..

    ردحذف
  2. هع هع هع هع هع هع اجل فتاه شقراء<<<اي والله صدقت الهرجه

    وبغيت اشوفك واعطيك على مخك واقولك استحي على وجهك واهلك الي واثقين فيك<<<<دخلت غلط
    خخخخخخخخخخخ

    بس ماشاء الله اسلوبك الييييييييييييييم



    روووووووووووووووووووووعه

    وش بعد خلاص خلصت ..

    اوك اوك اوك الامور طيبه واحنا بخير..<<<توها شايفه مسرحيه خاربه خاربه

    ومايستفاد من قصتك...

    ان الكل نومه معتفس مع اول اسبوع

    ونصيحتي لك ..حاول تقاوم يوم من غير نومه العصر..وبيزبط نومك<<مجربه ..هع

    ويعطيك العافيه فيصل عالقصه الجونان..

    في آمان الله

    ردحذف
  3. هلا والله بكم
    هلا ana4life
    امممم
    دراسة لغة الكفار على الصبحيه تجيب الحلوم وتخرب النوم- وخلني افكر اقول لكم قصتي مع حربي مع الفرنجة قبحهم الله-

    اما الحلم...ونهايته التعيسة خلتني ماعاد افكر انوم في الباص
    شاكر لك مرورك
    ورفعك لمعنوياتي -حسستني اني كاتب في جريدة الرياض-
    ===
    هلا والله بديدو D!cster
    ههههههههههههههههههههههههههههههه
    فتاة شقراء من وين لي في البترول؟؟؟
    يجيك واحد توه صاحي جنبك ويلف شماغه على راسه وينام
    النوم المعتفس دواه اليوم يوم الاربعاء

    شاكر لك نصيحتك الحلوه ومرورك الاحلى
    ومدحك لقصتي الجونان<<<صدق نفسه على طول
    في امان الله

    ردحذف
  4. ههههههههههههههههههههههههههههههههههههههههه
    والله من الضحك عجزت أتحرك ههههههههههههههههههههههههههه
    انا من سمعت شعر توقعت يكون أحد ((الكدش)) اللي بجامعتنا ’ لكن يوم صار أشقر قلت لا لا لا لا

    بشكل عام القصه خوقااااااااااااااااااااااااااق

    وفيها فوائد كثيره
    أهمها
    1- كل يوم داوم بتيشيرت خالك حمد عشان تنام بالباص كويس
    2- لا تدخل معك بنت للغرفه
    3- حتى اذا دخلتها لا تحل لها مسائل ماث
    4- لا تقبل هدية بنت ماهي من اقاربك

    اخيرا أبي أسئلك سؤال وتجاوبن بكل صراحه ,,,,
    كم رقم لوحة الباص اللي نمت فيه خخخخخخخخخ
    ؟؟؟؟؟؟؟؟؟؟؟؟؟؟؟؟؟

    ننتظر جديدك
    محبك \\ ماني معلمك

    ردحذف
  5. ^^^^^^^^^
    ههههههههههههههههههههههههههههههه
    محبي المجهول :قلب: <<حركاتskfupm هههههههه
    او غير معرف او ماني معلمك
    سعدت جدا بمرورك

    عاد اصحاب الكدش لايجلس قدامك في كلاس هههههههه

    ونجي للفوائد خخخخخ
    1-تي شيرت خالي حمد حاليا في المغسله
    2-لا تدخل بنات معك الغرفه<<< اللي يشوفني يقول متعود هي الشقراء والوحيده ههههههههه
    3- الحمد لله انها ماقالت فيزيا ولا كان اتوهق قدامها
    4- مافهمتا

    ههههههههههههههه
    يااني فقعت ضحك على السوال الاخير
    مااذكر اللوحه بس اللي يسوقه كان ابو شنب عريض وطاقيه مشخله هههههههههه

    وفي الاخير
    شكرا لمرورك على شخبوطاتي

    ردحذف
  6. هلالي ثقيل دم
    لا عاد تكتب

    ردحذف
  7. جوعتني :P

    ردحذف
  8. ههههههههههه
    صار عندي كثير غير معرف ...
    غير معرف اللي فوق... ودي اسألك يوم قست وزن دمي كم طلع؟؟؟
    وترى فيه جزء ثاني من القصه حياك الله اذا نزلته وابغاك اول واحد تقراه

    غير معرف الثاني هههههه...
    وش اللي يخلي الواحد يجوع في القصه...
    بس اتوقع البنت الشقراء ماتعرف تطبخ *_^

    ردحذف
  9. هلحين ماتقولي وشدخل خالك حمد
    بعدين قله وجابك من ذيك الديرة

    ردحذف
  10. ^^^^
    هو اللي جاب لي التيشرت (الفنيله)
    هههههههه
    حطوا اساميكم بدال غير معرف ترى بديت اضيع خخخخخخخ

    ردحذف
  11. هههههههههههههههههههههههههه

    يقلع شرك عيشتنا جو مع هالقصة يا فيصل ..

    أنا ما اتحمل أقرأ قصص رومانسية على طول أذوب ...

    ما أقول إلا الله يرزقك بذيك البنت القمر قول آمين

    أخوك بوقاسم

    ردحذف
  12. هلا والله بوقاسم ومنور المدونه

    اي رومانسيه
    الرومانسيه في وادي وانا في وادي!!!

    آمين
    من بؤك لباب السماء
    وياك ان شاء الله

    ردحذف
  13. هههههههههههههههه والله هذي ثاااني مره تسووويهااا
    هذي مع قصه الدجاااجه
    وقسم اقرى وانا مصدقه الف
    اقووول شفيييه الولد كذا يكتب اشياااء عيييب بمكاااان عاااام
    واخر شي افقع ضحك على حالي..
    يعطيييك العافييييه اسلووووب مره حلووو ..
    وطريقه جميييله للطرح وكلمااات ولا اروع تخلينا عنجد نصدق .
    الله يوووفقك انشالله بالدراسه وبالصيفي وبكل حيااااتك
    قرات تدويناااااتك بس مدري وشم معنى هذي الي علقت عليهااا
    .
    .يعطييييك العافيييه

    ردحذف
  14. ههههههههههههههههههههههه
    منوره يالهنوف...
    واكلتي المقلب مرتين اجل هع هع هع...
    الله يعافيك
    وشاكر لك مرورك... واطرائك لأسلوبي <<< كبر راسه...
    الله يوفق الجميع

    شاكر لك مرورك...
    ومنوره المدونه
    كوني بالجوار...
    والله يعافيك ^_^

    ردحذف
  15. هههههههههههههههههههههههههههههههه ..
    مرآ خطييره اندمجت بقوه وخقيت .. :D
    نصيحه لآ عـآد تنآم في البآص .. :P

    واللي يقول : هلالي ثقيل دم
    لا عاد تكتب ..

    وشش تحس فيه , و لبـى ـآ الهلآليين :D

    موفق آن شـآءآلله <3 ..

    ردحذف
  16. فيصل الله يهديك دخلتني جو قلت من السمستر الجاي بوقف في مواقف العماير وبجي بالباص يمكن أصادف هالبنت ................... بس في الأخير حطمتني ههههههههههههههههههههه جامعة ماتشوف فيها غير التماسيح ههههههههههههه

    صراحة انا عدو القراءة ولا أحب أقرا وكل مرة أدخل مدونتك احوس وأكسل أقرا وأطلع بس اليوم شدني هذا الموضوع بزيادة ولا ندمت إني قريته ........... أسلوبك رائع ومشوق جدا جدا جدا جدا إلى بكرة إلى حد إنك لو ماقلت ان السالفة حلم والله إني كنت أبصدق في البداية..........

    ردحذف